|
Pārongo atu
Tirohia tā mātou paetukutuku
www.ma-tereo.co.nz waea rānei ki 0800 MA TE REO (0800 628-373) |
Mā Te Reo
Taumata 14,
Pokapū Whakangao
Kokonga o ngā ara o Balance me Featherston
TE WHANGANUI-A-TARA |
|
Mā Te Reo
P P 411
TE WHANGANUI-A-TARA |
|
| Waea: |
|
+ 64 4 471-6733 |
| Waea Whakaahua: |
|
+ 64 4 471-2768 |
| I-mēra: |
|
clayton@tetaurawhiri.govt.nz |
|
|
![]() |
| |
| "Whāngaia ki te kōrero kia pehapeha ai te korokoro, tērā i te kererū i runga i te miro"
Tēnā koutou katoa,
Tēnei te mihi ki a koutou te hunga hāpai i te reo rangatira, tae atu ki ngā tikanga tuku iho a rātou mā kua mene atu ki te pō. Kāore he ārikarika o ngā mihi a te tari o Mā Te Reo ki a koutou e ngana nei ki te whakaora, whakamahi i te reo.
Nō reira tēnā koutou, tēnā koutou, tēnā koutou katoa.
|
|
|
Hei te Paenga-whāwhā tono ai - Te Rāuna Pūtea Tuawhitu - Hei te Paenga-whāwhā tono ai!! |
Ka rewa tēnei putanga o tā mātou ī-pānui i te huakitanga o te tau tuawhitu o Mā Te Reo, ka Tuwhera ā te 2 o Paenga-whāwhā. Ko tā mātou kaupapa nui mō tēnei tau kia kaua ngā kaitono e tatari kia tae tonu ki te rā kati kātahi anō ka tono mai ki te Mā Te Reo; i tua atu kei te whakatenatena mātou i te hunga tono kia tono mai i te marama o Paenga-whāwhā. Kaua e kōhukihuki, tono mai hei mua i te paunga o Paenga-whāwhā. Kei te mutunga o tēnei pānui ngā rā nui. |
| Pēhea te tono |
Me tono i runga i te ipurangi i te paetukutuku (www.ma-tereo.co.nz) mā te whakamahi i tō ingoa kaiwhakauru me tō kupuhipa. Mēnā kāore anō koe kia rēhita, haere ki te whārangi kāinga, ka pato i te hono takiuru, ki te pātene ‘Haina Mai’ kei runga rawa. Ka kawea koe ki te whārangi Existing User Sign In, ka pato i te:
Rēhita Kaiwhakamahi Hou
Whai muri i tō rēhitatanga ka whiwhi i-mēra koe e whakaū ana i tō rēhitatanga. Taihoa ka tukuna he i-mēra ki a koe me tō Ingoa me tō Kupu Whakataha. Hei mua i te Tuwhera o te Rāuna ka whakaūtia ngā rēhitatanga ia wiki; ina tuwhera te Rāuna ka whakaūtia ngā rēhitatanga ia rā.
Mō te hunga kāore he pānga ki te rorohiko, ka āhei te tono mōkī mai i a Clayton – waea ki a 0800 MA TE REO (0800 628 373), i-mēra rānei ki clayton@tetaurawhiri.govt.nz
Ka nui atu tā mātou aro ki te tono mēnā:
-
Mēnā kua tono koe ki a Mā Te Reo i mua, i oti pai ō tūmahi o mua, ā, kua oti i a koe ngā taumata katoa
-
Kei te mārama, kei te poto ō korero mō tō tūmahi. Kei te mārama ki Te Rōpū Tautoko ko wai tō rōpū, he aha hoki ā koutou mahi.
-
Kei te mōhio koe he aha ngā nekeneke i tō hapori i te taha ki te reo Māori
-
Ka haere ngātahi tō tūmahi i te taha o ngā nekeneke i tō hapori e pā ana ki te reo, ā, kei te hāngai hoki ki tētahi mahere reo kua oti te whanake.
- I āta whakatakotoria te pūtea mō tō tūmahi, i whakaatu e koe he aha te wāhanga o te pūtea ka whakaratoa e koe/tō rōpū
-
Kua whakaatu e koe ka pēhea e whai wāhi tō tūmahi ki ngā whāinga o te Pūtea
Ka whakamihi te rōpū o Mā Te Reo ki a koutou me ā koutou tono mō te tau 2007; ki te pīrangi āwhina koutou whakapā mai ki a mātou. Kei te wātea ngā kaimahi i te tari o Te Puni Kōkiri tata ki a koe ki te āwhina i a koe ki te whakakī i tāu puka tono, ki te hono rānei ki te ipurangi, e āhei ai rātou te tono mā runga i te ipurangi. Pātaihia te Kaiwhakarite mō ētahi āwhina. Mēnā kei Te Whanganui-a-Tara koutou, peka mai ki te tari, ka nui tā mātou hari ki te tutaki i te hunga tono.
I ngā rā tata nei i whai wā mātou ki te kōrero ki tā mātou kairuruku kei Wharekauri. Nō tērā tau ka tae mai te tono tuatahi a te Iwi Moriori. Kei te whakahaere Wānanga Reo rātou i tēnei wā, kei te whakahiato hoki rātou i tētahi mahere reo. Mō te roanga atu o ngā pārongo mō te rāuna pūtea mō te tau 2007, titiro ki te paetukutuku, www.ma-tereo.co.nz, whakapā rānei ki a Clayton mō tētahi pokapū, clayton@tetaurawhiri.govt.nz waea rānei ki 0800 MA TE REO (0800 628-373).
|
|
|
| Heamana hōu mō Te Rōpū Tautoko |
Kātahi anō ka tohungia a Huhana Rokx hei Kaiwhakahaere Matua hōu o Te Taura Whiri i te Reo Māori, nā reira ka eke a ia hei Heamana o Te Rōpū Tautoko, te komiti whakahaere i te pūtea o Mā Te Reo. Ko ōna iwi ko Te Arawa, ko Ngāti Porou, ko Ngāti Awa, ko Ngāti Maniapoto. Whānui ōna wheako i te rāngai mātauranga, noho ai ia ki ētahi tūranga ikeike. Hei te marama o Haratua ka tīmata tana mahi i Te Taura Whiri, nā reira ka ārahi a ia i Te Rōpū Tautoko i ngā arotake tono mō te Rāuna Tuawhitu. I tua atu i ōna wheako nui i te rāngai mātauranga, pūmau a ia ki te reo.
"Ko taku tūmanako kia ora haere tonu te reo Māori, kia aro mai ngā tāngata katoa o Aotearoa ki tōna ātaahua, ki tōna ahurei."
Huhana Rokx |
|
Pānui Whakatairanga Hōu i a Mā Te Reo |
Nō tata nei ka hangaa he pānui hōu hei whakatairanga i a Mā Te Reo. Me kī, e rua ngā kaupapa i te pānui. Ko te kaupapa tuatahi a “Whakapakari Whānau, Whakapakari Reo, ka whakaatu i te wāhi nui ki te reo Māori i roto i te whakapakaritanga o te whānau. Ka arotahi te kaupapa tuarua ki te hāngai o Mā Te Reo ki te hapori, kotahi anake te rāuna pūtea i te tau, me tono hei te marama o Paenga-whāwhā. Ki te pīrangi koe i tētahi pānui whakatairanga hei whakaatu ki tō hapori tono mai mā te i-mēra ki a Clayton.
|
|
| |
Nō te 9 o Hui-tanguru ka tūtaki mātou ki te hunga whakarato o Horowhenua. Ngā mihi ki a Sonya Daly, mō tana manaaki i a mātou; me tana whakarite taiwhanga i Te Wānanga o Raukawa mō te rā. Ka pai ki a mātou te tūtaki i ētahi kaiwhakarato hōu, me te rongo kei te pai te haere o ngā tūmahi. Ka pai hoki ki a mātou te whakakī ngā puka hei whakaoti i ētahi tūmahi kua roa e noho tāwēwē ana. I tū ā mātou hui me ngā kairuruku / māngai mai te rohe:
- Whakatupuranga Rua Mano Inc. Society
- Raukawa Marae Information and Support Services
- Te Kāhui o te Tonga
- Kirsten Hapeta (individual)
- Te Rūnanga o Ngāti Rangitihi
Nō te 14-16 o Hui-tanguru ka tūtaki mātou ki te hunga whakarato mai Taupō, Tūrangi, Tokoroa, Te Kūiti. Ngā mihi ki a koutou i wātea ki te kōrerorero me mātou mō ā koutou tūmahi me te whanaketanga o te reo i ō koutou rohe. He oranga ngākau kei te tīmata ētahi hapori ki te whakatakoto mahere reo me te ruruku i ngā kaupapa e pā ana ki te whakaora i te reo.
Ka hui mātou ki ngā kairuruku tūmahi me ngā māngai mai:
- Te Whare Ahorangi
- Te Poari o Ngāti Tūwharetoa/Hei Ara Kōkiri Tūwharetoa Education Trust
- Ngā Uri a Maata Ngapo Charitable Trust
- Kamureti Merenia Moeke Whānau Trust
- Tui Trust Board
- Marae o Otukou
- Raukawa Trust Board
|
|
| |
Hei tautoko i te haerenga aromatawai ki te Poari o Ngāti Raukawa, nō te 22 o Poutū-te-rangi ka haere a Jasmine ki tētahi hui i te marae o Pikitū i Tokoroa, ki te kōrero ki ngā māngai mai ngā marae 20 o Ngāti Raukawa mō te tikanga tono ki a Mā Te Reo. I roto i te tau ka huri ka mahi te Poari o Raukawa i Tokoroa me ngā marae katoa o te rohe kia taea ai e rātou te whakahiato i ā rātou ake mahere reo. He wāhanga tēnei o te mahere reo Whānui, “Whakareia Te Kakara O Te Hinu Raukawa”, he kaupapa i āwhina e te CBLI (Community Based Language Initiatives) he kaupapa whakahaere e te Tāhuhu o te Mātauranga.
Ka rawe Ngāti Raukawa, ka rawe hoki tō ruruku i ō kaupapa whakaora reo, whakatakoto mahere reo.
'Whakareia Te Kakara o Te Hinu Raukawa' Te Rautaki Reo Māori o Raukawa
|
|
| |
| Rāuna Tuawhā (2004) |
Kei te ngōki mātou ki te otinga o ngā tūmahi i te Rāuna Tuawhā, e whā anake kei te toe, kua tata ki te otinga. Mēnā nāu ētahi o ēnei tūmahi e whā, kei te īnoi mātou ki a koe kia whakaoti e koe tō tūmahi.
|
| Rāuna Tuarima (2005) |
I tēnei wā e 30 ngā tūmahi kāore anō kia oti i tēnei Rāuna. Mēnā ko koe tētahi i whai āwhina i te pūtea a Mā Te Reo i tēnei Rāuna, ka mutu kāore anō kia oti tāu tūmahi, me kōrero tātou. Mehemea kāore anō a Clayton kia kōrero ki a koe mō tēnei take, kia mōhio koutou ka pā a ia ki a koutou hei ngā wiki tata nei. Mēnā he tōmuri tō tūmahi kaua e whakamā, taea noatia ai te whakaroa atu i te wā mōu, te whakarerekē hoki i ngā ritenga o te kirimana. Ko te mea nui kia mōhio mātou kei te pēhea te haere o tō tūmahi.
|
| Rāuna Tuaono (2006) |
Kua tīmata ngā kirimana katoa i te Rāuna tuaono, ā, e 31 kua oti. Tēnā tirohia tō kirimana mō ngā rā kati. Mēnā kāore anō kia tutuki ētahi o ngā taumata, whakapā ki a Clayton. |
|
| He āwhina |
Ka tae ki te wā hei whakaoti i tō Purongo Aromatawai Whakamutunga (i te otinga o tō tūmahi) me whakakī e koe te wāhanga tuatahi e pā ana ki te whakamārama i tō tūmahi. Kua wareware ētahi o ngā kaitono ki tēnei. Me whakautu ngā pātai katoa; ki te kore, ka whakahokia e mātou ki a koe hei whakakī, ā, tērā pea ka tō roa te tuku i te utu mō te taumata whakamutunga.
|
|
| Pūrongo Rangahau/Aromatawai i a Mā Te Reo |
Kei te mōhio te tokomaha o koutou kei te whakahaere mātou i te tūmahi aromatawai whakaroto tuatoru. I tēnei wā kei te arotahi mātou ki te whakahiato i tētahi pou tarāwaho mō ngā putanga a Mā Te Reo. I tukuna he i-mēra ki ngā kaitono katoa e whakamārama ana i te tūmahi me ngā āwhina tērā ka taea e koutou.
I tangohia noatia e mātou ētahi o te hunga whakarato mai ngā tūmahi kua oti i roto i ngā rāuna e ono kua tohipa. Ka tukuna ētahi pātai ki ēnei kaiwhakarato hei whakakī mā rātou ka whakahoki mai ki tō mātou tari o Mā Te Reo. Ki te titiro, ka oti te wāhanga tuatahi o te tūmahi nei ā te paunga o te marama o Pipiri i te tau 2007.
Ka tuku e mātou ngā putanga o tēnei take hei te ī-pānui a Mā Te Reo kei te tū. Mēnā he pātai āu whakapā ki a Nerissa Aramakutu i nerissa@tetaurawhiri.govt.nz. |
|
| Ngā kaupapa a Mā Te Reo |
| Whakaterenga o te Rauemi Whakapapa a Ngāti Rārua Atiawa Iwi Trust |
Nō te Rātapu 17 o Hakihea 2006 ka tae a Clayton ki te whakaterenga o Toi Whenua, ka tū ki te marae o Te Awhina i Motueka. I whakaterengia te pukapuka i te hākari mā ngā kaumātua. I āwhina e te pūtea o Mā Te Reo te hanga i te puka nei a Toi Whenua. I hangaa a Toi Whenua hei aratohu mō ngā uri whakaheke o Te Ati Awa rāua ko Ngāti Rārua. Whakahaerehia ai ō rātou whenua i Motueka e te Ngāti Rārua Atiawa Iwi Trust.
“Tōia ngā tuhi, he tuhi mā wai. He tuhi māku, he tuhi māu, mā te whakatau. He tuhi nā nuku te māharahara. He tuhi nā nuku te awhiawhi. I ahu mai i ngā kōrero mō te rangi. I ahu mai i ngā kōrero mō te whenua. I ahu mai i ngā kōrero mōu. Mō ngā iwi nō te takiwā nei.
He wā ia ka whakatōngia ki te ngākau, ka titia ki te rae. Kapohia ake aku ringa ki ngā tohu o te raukura hei oranga wairua. Ko te aroha anō tērā e kaha ai tātou. Ka herea tō manu weka ki te motu hangaia ki te taura tangata, hei oranga mōku, i te hau ā-kiko. Takoto ake rā he ara ki te maungārongo e tangata ai tātou, e puta ai i ngā taimahatanga o te wā. Kei ngā tete kura whakakī whāruarua, kei ngā awe toroa o te tai whakauru, kei ngā kaiwharawhara o ngā waka manu o Tainui, o Tokomaru.
Tēnei hoki te whakatau ake ki aku manu whakahirahira. Kua tau te tuhi kōrero o ngā iwi nei, e kōrero ana te whārangi o Rārua, e waha ana te aute o Awanuiārangi.
He tuhi māreikura. He tuhi rangi. I riro whenua atu, kua hoki mai te whenua, hei oranga mō te iwi”.
Ehara i te mea ka kapi te tāhū kōrero o ngā iwi me ngā hapū i noho ki Motueka e te pukapuka nei; heoi, he tīmatanga noa ki te tūhura i ngā kōrero o mua. E ai ki te Māori me mōhio ki ngā kōrero o mua ka mārama ai te ahu whakamua. Ka whakahoki e te pukapuka nei te tangata ki ngā rā o mua, ka tīmata i runga i te karakia. Mā ngā whakapapa, ngā pepeha, ngā waiata a Te Ati Awa rāua ko Ngāti Rārua e whai hononga ai ngā uri ki te iwi. Ka kōrero te pukapuka mō te heke o ēnei iwi ki te tonga mai ō rāua kāinga tūturu i te tai hauāuru o te Ika-a-Maui kia tatū ki ngā rohe o Whakatū me Wairau, arā ki Te Tau Ihu o te Waka a Maui. Ka takoto ngā kōrero mō ngā tūpuna i te wā ka murua ngā whenua i Motueka, tae atu ki te orokohanga o te Ngāti Rārua Atiawa Iwi Trust.
Mā ngā kōrero i te pukapuka nei ngā uri o Rāruaioio me Awanuiarangi e hono mai, hāunga te wāhi o te ao kei reira rātou e noho ana. He hīkoi tēnei o te ngākau, te hinengaro, te wairua. A tōna wā tātou tūtaki ai anō ki ō tātou whenua tipu - Toi Whenua. (nā Olivia Hall ngā kōrero, NRAIT, kairuruku tūmahi a Mā Te Reo)
Te pukapuka o ‘Toi Whenua' |
| Taiāwhio Motu Kōpae Pūoru REO |
Ahakoa nui rānei, iti rānei te hunga mātaki, ka rawe kē ki a rātou ngā waiata o te kōpae pūoru reo Māori kiia ai ko ‘REO’. Nā te pūtea a Mā Te Reo te taiāwhio motu i tautoko i te haerenga mō te rua wiki ki te whakatairanga i te kōpae pūoru me ā rātou ake waiata. E ai ki te kaiwhakarite a Neil Cruickshank o Maorimusic.com, he waiwai ngā taiāwhio motu kia rongo ai te tini me te mano i ngā waiata hōu me te reo i runga i te hari me te koa. Nā te matatau nei nā Ruia Aperahama i arataki te tira haere nei. Tū ai ngā whakangahau ki Te Wai Pounamu, Tokoroa, Kaitāia, Tūrangi, Te Whanganui-a-Tara, Whanganui, Whakatāne, Taranaki me Heretaunga.
Piripi Christie He kohinga te kōpae pūoru o “REO’ o ngā waiata Māori mai ngā momo o te rap, reggae, R n B. Ko tētahi o ngā waiata he waiata haumaru tamariki kōhungahunga i runga i te huarahi. Ko ngā kaiwaiata ko Maria Elliot, The Big Three, Rochelle Biddle, Tūmamao Harawira, Riana Atama-Adams, Erena kōhungahunga, Piripi Christie, Rānea rāua ko Awha, Charnao, Kommikal, Morgana Watson, Cilla Gardiner. (Nā Ana Tapiata ngā kōrero)
Ranea Aperahama |
| Tauranga Moana - Ka whai hua te Kura Reo ā-Iwi! |
I tērā o ngā ī-pānui ka mea atu mātou ka kōrero mātou mō tētahi Kura Reo ā-Iwi, nā reira ka koa mātou ki te tapae i tēnei kōrero mō tētahi kura reo ā-iwi ki te moana o Tauranga.
Nō te marama o Whiringa-ā-nuku i te tau 2006 ka tū he kura reo ā-iwi ki te marae o Otawhiwhi i Tauranga. Ka hia marama te iwi kāinga e whakataka ana mō tēnei hui. E ono tekau ngā tāngata i tae atu ki te kura mai ngā iwi o Ngāi Te Rangi, o Ngāti Ranginui, o Ngāti Pūkenga. Nā ngā āwhina a te pūtea a Mā Te Reo ka taea ai e te Rūnanga o Ngāi Te Rangi te pānui me te whakahaere pai i te kura. Ka tono a Ngāi Te Rangi ki a Ngāti Ranginui rāua ko Ngāti Pūkenga kia haere ake, kia noho mā ngā iwi tokotoru te kura e whakahaere.
Hei tā te kaiwhakarite o te Kura Reo ā-Iwi a Riri Ellis, “Ko te whāinga o te Kura Reo ā-Iwi kia rumakina te hunga ka tae atu – mai ngā mea āhua matatau tae atu ki te hunga matatau i te reo – ki roto i te reo Māori mō ngā rā e rima o te kura.” Hei tā Pohe Luttenberger te māngai o Ngāti Ranginui, “E rua ngā momo ako i hanumi i te kura: ko te wānanga me te taiwhanga ako. Koianei pea te wā tuatahi kua penei te ako ki ngā Kura Reo. Ko te mea nui ki ahau ko te mahinga tahitanga o ngā iwi e toru kia tutuki ai te kaupapa.”
Ko Hauata Palmer te heamana o te Rūnanga o Ngāi Te Rangi, koia hoki tētahi o ngā kaiwhakarite o te Kura Reo ā-Iwi, “He hui tino whakahirahira tēnei i te mea i taea e ngā kuia, koroua te whakahaere i ngā mahi katoa i roto i tō tātou reo rangatira. I taea hoki te whakakatakata i te katoa i roto i ngā whakataetae hei whakaohooho i te katoa ahakoa pakeke, taiohi rānei. Ko te tūmanako ka whakahaeretia anō ētahi Kura Reo hei painga mō Tauranga Moana”.
Ehara i te mea hanga noa mō ngā iwi o te moana o Tauranga te whakahui i ngā kaumātua pērā i a Hauata Palmer, Kihi Ngatai, Pae Wanakore, Hauoterangi Tutua ki te wāhi kotahi. Kātahi tētahi whitiwhitinga kōrero mīharo ko te wānanga a ngā kaumātua i tēnei mea te whaikorero. Ka rongo te wānanga i ngā whakamārama a ngā kaumātua nei mō ngā tikanga, mō te kawa. Hei tā Riri Ellis anō, “Ko te tūmanako ka haere ēnei Kura Reo ia tau ki waenganui i ngā iwi o te moana o Tauranga, ā, ka mahi tahi ai ngā iwi ki te whakatutuki i te kaupapa.” Ko tana wawata ka pai ake ngā hui ia tau, ka nui atu te hunga ka tōia atu. I whai hua te Kura Reo ā-Iwi nō te mea i rongo te hunga rangatahi i ngā akoako a ngā kaumātua o te rohe. He painga mō ngā kaumātua kia rongo ki ngā kōrero katakata me ngā rerenga kōrero, kia whai wāhi hoki ai rātou ki ngā momo akomanga katoa. E ai ki tētahi koroua, nā tōna mokemoke kia rongohia te reo, kia whitiwhiti kōrero Māori me ētahi atu kaumātua a ia i tō ki te Kura Reo. Ka kapi te hui i runga i te hākari me ngā waiata o te pō. (ko ngā kōrero nā Riri Ellis, te kaiwhakarite tūmahi Mā Te Reo)
Ngā kaiwhakauru mo te kura reo ā-iwi ki Tauranga Moana
Whakapā ki a:
Riri Ellis - Rūnanga o Ngāi Te Rangi - (07) 5753 765 x 210.
Teraania Orsmby - Rūnanga o Ngāi Te Rangi - (07) 5753 765 x 216.
|
|
| Kura Reo kei te tū - Whakapakari Reo |
| Ngāi Tahu Kura Whakapakari Reo |
| Rā: |
10 -15 Paenga-whāwhā 2007 |
| Wāhi: |
Kura Tini o Ōtautahi |
| Pōwhiri: |
3pm, Rātū 10 o Paenga-whāwhā 2007 |
| Utu: |
$250 (pakeke) $50 (tamaiti) |
Mō ētahi atu whakamārama whakapā ki a Charisma Rangipunga i charisma@akeassociates.co.nz |
|
|
Ngā Pānui Whānui mō te Reo Māori |
Kia mau: Ki te hiahia koe kia pānuitia tāu kaupapa i āwhina e te pūtea a Mā Te Reo ki roto i te ī-pānui, tēnā i-mēra ki a Nerissa Aramakutu i nerissa@tetaurawhiri.govt.nz
|
|
| Ngā Rā Nui mō te Rāuna Tuawhitu |
| Ka huaki te Rāuna: |
Rāhina 2 o Paengawhāwha 2007
|
| Ka kati te Rāuna: |
Rāmere 27 o Paenga-whāwhā 2007 (mō ngā tārua me ngā tono i-mēra, waea whakaahua hoki) |
| Ka kati te Rāuna: |
11 o Haratua (mō ngā tono mā te ipurangi) |
|
|
| Te Rōpū o Mā Te Reo |
Anei anō ngā pārongo mō te hunga mahi o Mā Te Reo me ngā nama waea tika atu:
Jasmine Cooper
Kaiwhakahaere Tūmahi,
04 471 - 6727
jasmine@tetaurawhiri.govt.nz
Nerissa Aramakutu
Whakamāherehere Tūmahi (Aroturuki me te Arotake)
04 471 - 6728
nerissa@tetaurawhiri.govt.nz
Clayton Reiri
Kaitohutohu Tūmahi,
04 471 - 6733
clayton@tetaurawhiri.govt.nz
Catherine Sinclair
Whakahaere Tari, harangotengote,
04 471 - 6730
catherine@tetaurawhiri.govt.nz |
|
Mō te roanga ake o ngā kōrero
Tirohia tā mātou paetukutuku www.ma-tereo.co.nz me waea atu rānei ki te nama 0800 MA TE REO (0800 628-373) |
| Mā Te Reo
Papa 14,
Investment Centre
Kokonga o ngā ara Ballance me
Featherston Streets
TE WHANGANUI-A-TARA |
Mā Te Reo
Pouaka Poutāpeta 411
TE WHANGANUI-A-TARA |
| Nama Waea: |
+ 64 4 471-6733 |
|
| Waea Whakaahua: |
+ 64 4 471-2768 |
|
| I-mēra: |
clayton@tetaurawhiri.govt.nz |
|
|
|
