| Mihi |
|
Nau mai ki tēnei te e-pānui tuarua a te rōpū o Mā Te Reo. Ko te tūmanako i pai ki a koutou tā mātou putanga tuatahi. Ka puta te pānui nei i te wā o te Rāuna Tuarima. Kei roto ētahi tohutohu, kupu āwhina i a koutou ki te whakakī te puka tono, e eke ake ai tā koutou tono ki tētahi taumata mai kore ka manaakitia. Mā te whakakī tika i ngā puka tono e māmā ai ā mātou mahi whakahaere i a Mā Te Reo, e nui ake ai te wā ki ētahi atu tūmahi. Heoi he whakamōhio ki a tātou...
|
|
| |
Mō ētahi atu whakamārama
Titiro ki ta matou pae tukutuku ara, www.ma-tereo.co.nz waea ranei ki 0800 MĀ TE REO (0800 628-373) |
Mā Te Reo
Papa 14,
Te Whare o PSIS
Kokonga Ballance me Featherston
TE WHANGANUI-A-TARA |
|
Mā Te Reo
Pouaka Poutāpeta 411
TE WHANGANUI-A-TARA |
|
| Waea: |
|
+ 64 4 471-6733 |
| Waea Whakaahua: |
|
+ 64 4 471-2768 |
| I-mēra: |
|
kelly@tetaurawhiri.govt.nz |
|
|
 |
| Rere atu te Manu |
Hei te paunga o te marama ka mutu te mahi a te kaiwhakahaere o te tari, a Kelly Harding. Ka nui te aroha o etahi o ngā kaitono mōna, ā, me te tipu hoki o tōna aroha mō rātou. Kei te pōuri te rōpū o Mā Te Reo i tōna wehenga. Ka nui mārika ana mahi mō Mā Te Reo. Kei te rapu a Te Taura Whiri i tētahi tangata hei whakakī i te tūranga o Kelly, ā, hei tērā putanga ka whānuitia atu ngā kōrero mō tēnei take. Heoi, kei te tari tonu nei a Kelly mō ēnei wiki kei te tū.
|
|
| Pānui whakamārama a Mā Te Reo |
Kātahi anō ka oti tā mātou tā i tētahi pānui whakamārama mō Mā Te Reo. Ka whakamārama te pānui i ngā kaupapa taketake a Mā Te Reo – nōnahea whakatūria ai a Mā Te Reo, he aha te take i whakatūria ai, me pēhea te tono, ngā momo tūmahi tērā ka āwhina, aha atu. Ki te pīrangi pānui koe tēnā whakapā mai.
|
|
| Rāuna Tuawhā |
Hei whaiwhai ake i ngā kōrero i te pānui tuatahi, i whakapā atu mātou ki ētahi rōpū e 126 ki te tuku tono mai i te Rāuna Tuawhā. Tatū rawa ki te rā 11 Āperira 2005, āhua e 30 ngā tūmahi i oti, ko te toenga ka oti i roto i tēnei tau.
|
|
| Momo Tūmahi |
Titiro ki ētahi momo tūmahi kei te pae tukutuku – www.teara.co.nz. Kei roto ētahi kōrero mō ētahi tūmahi i raro i a Mā Te Reo – pēnei i te āhua o te tūmahi, ētahi kōrero mai ngā kairuruku tūmahi, ētahi whakaahua hoki. Ko te tikanga o ēnei kōrero, he whakaatu i ngā momo tūmahi me te whānui o ngā tūmahi i raro i a Mā Te Reo. Me areare ō koutou taringa ki ngā kōrero mō tēnei take ka pāhotia i ō koutou reo irirangi ā-iwi, he wāhanga o ngā whakatairangatanga o te Rāuna Tuarima.
|
|
| Ngā Pūrongo Kāore Anō Kia Tau |
He wāhi nui o te tikanga arotake kirimana ngā pūrongo mai i te hunga kua whiwhi āwhina i a Mā Te Reo, mō te haere o ā rātou kaupapa me tā rātou whakapau i te tahua. Mā ēnei pūrongo taea ai e te rōpū o Mā Te Reo te titiro kei te pēhea te haere o ngā tūmahi i raro i a Mā Te Reo, me te whakarato āwhina tērā ka hiahiatia. Heoi,
he nui rawa te hunga kāore i te oti ā rātou pūrongo i ngā wā e tika ana. I te mutunga, ka pokea mātou te rōpū o Mā Te Reo i te nui rawa atu o te mahi. I te wā kua pahure, kāore mātou i whaiwhai ake i ngā pūrongo tōmuri; hāunga tērā, kua mārō tā mātou kawe i ā matou mahi arotake. Nā reira kia kamakama te tuku mai ā koutou pūrongo. Me kaua e waiho mā mātou koutou hei whaiwhai haere!
Mēnā kei te whakahaere tūmahi koe me ētahi āwhina i a Mā Te Reo, ko te tikanga kua oti i a koe ngā rā Tutuki te miramira (me titiro ki Wāhanga Rua o tāu kirimana). Ka whiwhi koe i tētahi i-mēra mai i a mātou e rua wiki i mua o te ekenga o tētahi tutukitanga. Ka tukuna tētahi atu i-mēra ki a koutou kotahi rā ki mua i te ekenga o taua tutukitanga. Ki te kore e taea e koutou taua tutukitanga me whakapā koutou ki te Kaiwhakahaere o te Tari o Mā Te Reo, ka whakamōhio mai āhea tae mai ai ngā puka e tika ana. Mēnā he roa rawa te tōmuritanga, ka taea pea te whakatikatika i te kirimana. Ka pīrangi hoki mātou kia mōhio kei te pēhea te haere o tā koutou tūmahi, nā reira me rite te whakapā mai ki a mātou o Mā Te Reo. Ahakoa he aha ngā kūrakuraku me whakapā mai ki a mātou, ko te tikanga ka taea tētahi huarahi hōu te whiriwhiri.
I te wā ka noho rātou ki te arotake i ngā tono ki a Mā Te Reo, ka aro Te Rōpū Tautoko ki te pai o te tuku pūrongo mai o ngā kaitono i ngā rā ki mua. Nā reira he mea tino nui te whakakī i ā koutou pūrongo tutuki i te wā e tika ana, kei mahue āu tono ki muri. Hei tohu mō tēnei, ko te kaitono tuatahi ki te whakaoti i tana tūmahi ā muri o te tohanga o te pānui nei (me oti ngā tutukitanga katoa) ka whiwhi i tētahi koti me tētahi pōtae pīni o Mā Te Reo.
|
|
| Rāuna Tuarima – Ētahi Āwhina E Kaha Ake Ai Tāu Tono i Te Tau 2005 |
Nōnakuara ka puta te kōrero a Haami Piripi te tumuaki o Te Taura Whiri mō te tipu o ngā tūmahi i raro i a Mā Te Reo puta noa te motu.
"I roto i ngā tau tata kua pahure, kua kite tātou i te pupūnga ake o ngā kaupapa ako i te reo ki roto i ngā hapori Māori. Kei te huri ngā tāngata ki te whakaaro he aha ētahi huarahi e taea ai te whakakaha i te reo Māori i roto i ō rātou whānau, i runga hoki i ō rātou marae. Mēnā he tirohanga āu mō tōu hapori, whakaarohia te tono ki a Mā Te Reo."
Kei te tautoko mātou i a Haami, engari me maumahara, kotahi hautoru anake o te hunga tono ki a Mā Te Reo i whiwhi āwhina pūtea mō ā rātou tūmahi reo Māori, nā te nui o ngā tono me te iti o te tahua o Mā Te Reo pēnei ai. Ko ā mātou tohutohu nui ki te hunga tono ki a Mā Te Reo arā:
 |
Me tono mā te ipurangi. Ka tono ana koe mā te ipurangi, me tutuki rā anō e koe ngā wāhanga katoa kātahi anō ka whakaaetia tāu tono. He rahi rawa ngā tono ā-pepa kei te ngaro ētahi wāhanga, kei te mahue rānei ētahi pārongo taketake; ka whakakāhorehia ētahi tono mēnā kāore i te kī ngā wāhanga katoa. |
|
Me aro ki ngā mea tuatahi kei te tirohia e Te Rōpū Tautoko. Mō tēnei rāuna, ko ngā mea tuatahi ka tirohia ko te Mahere Reo me ngā Kura ā-Iwi. |
|
Kia mārama te whakatakoto i tāu tūmahi. Kia mārama ngā whāinga o tōu rōpū. Kei te tae tonu mai ētahi tono ki a mātou, tē aro i a mātou! Kei pōhēhē koutou kei te mōhio mātou ki tōu rōpū me āna mahi. Pai ake ki te whakaatu mai ko wai koutou, he aha ā koutou mahi, kia mārama ai tā mātou titiro ki tā koutou tono. |
|
Mēnā he pātai āu, tukuna mai. Kei te mārama mātou, he uaua pea tēnei mahi te whakakī puka tono me ngā tikanga whakakī ki te hunga tauhōu. Engari kia kaha. Waea mai ki a 0800 628-373, tērā pea ka tareka e mātou te awhi i a koe mā te waea. Mēnā kei Te Whanganui-a-Tara tōu kāinga, haere mai ki tō mātou tari. Me whakapā rānei ki te Kaiwhakarite kei te tari o Te Puni Kōkiri e tata ana ki a koe. Mā rātou koe hei awhi ki te whakahiato i tāu tūmahi me te tono mā te ipurangi. |
|
Me paku noa i te tīmatanga. Mēnā he tauhōu koe ki a Mā Te Reo, kaua e tono mō te nui rawa o te pūtea. Me tutuki pai ngā tono iti i te tīmatanga, kia rongohia tāu pai, kātahi anō ka tono mō ngā āwhina āhua nui ake. |
|
Kia tōtika tāu pūtea. Me āta tātari i ngā whakapaunga moni. He maha ngā tono pai ka hinga i te nui rawa o ngā moni kei te tonoa. |
|
Kia wairua auaha. Ka rawe ki Te Rōpū Tautoko ngā tono āhua rerekē. Ahakoa te nui o te hua i roto i ngā wānanga reo, ka reka ki a rātou ngā mahinga reo auaha nei. |
Ki te kore e riro mai ētahi tautokohanga i a Mā Te Reo, kaua e pōuri! He mea nui tāu kaupapa mō te reo Māori – ki te kore e korikori te reo Māori i roto i ngā hapori, ka ngaro ia. Me tono anō ki a Mā Te Reo, me tono rānei ki a te Puni Kōkiri, COGs, ngā tahua Lottery, a wai atu, a wai atu.
E ai ki tētahi o te hunga i whiwhi āwhina i a Mā Te Reo,
"Mēnā kei roto i a koe te hiahia ki te kaupapa, ka taea ngā mea katoa, hāunga te moni. Ki a mātou, ko Mā Te Reo, he āwhina mō mātou ki te whakatutuki i ā mātou kaupapa. Mēnā ko te moni anake te whāinga, kāti, kei te hē ko te kaupapa. Nā reira ko tā mātou titiro, mahia te mahi; ki te taka mai he āwhina, ka pai kē atu."
Aua rā anō:
Ka tuwhera a Rāuna Tuarima ā te 4 o Paengawhāwhā 2005
Kati te rāuna: 5pm, 29 o Paengawhāwhā 2005 (mō ngā tono ā-pepa)
Kati te rāuna: 5pm 13 o Paengawhāwhā 2005 (mō ngā tono ipurangi)
|
|
| He tono mō ētahi kōrero |
Mēnā he kōrero āu mō tā koutou tūmahi, tukuna mai ki a mātou o Mā Te Reo. Mēnā he whakaahua, he āwhina, he pātai rānei ā koutou, ka ngana mātou kia whakaurua ki te pānui ka whai.
|
|
| Mā Te Wā...
|
|
|
