He WHAKAMAHARATANGA - kei te whakakore haere mātou i ngā aromatawai tuatahi…
E whakakore haere ana mātou i ngā aromatawai tuatahi mō ngā kaupapa kua whakaritea mō te wā o Matariki arā, kua kore mātou e whakaae ki ngā tono tahua mō ngā kaupapa e pā ana ki a Matariki i tēnei rauna. Otīa, mehemea e whakaaro ana koe ki te whakahaere kaupapa mō te wā o Matariki i te tau 2009, me tuku mai tō pukatono i tēnei rauna. Anei ngā kōrero i roto i tērā o ngā pānui:

"Kua whakatau a Mā Te Reo ki te whakakore haere i te mahi aromatawai tuatahi i ngā pukatono i ngā rauna e rua e whai ake nei. Kua uru mai tētahi mahi aromatawai i ngā tono i waho i te mahi aromatawai i ngā kohinga tono nā runga i ngā mahi mō Matariki.

Heoi anō rā, ehara tēnei i te pai. Me whakarite ngā rōpō i ngā tau e rua kei mehemea e whakaaro ana rātou ki te whakahaere kaupapa i te marama o Pipiri tae noa ki Here-turi-kōkā, me tono i te rauna ki mui i te tau ka huri."

Paearu Aromatawai Hōu
Kai te rerekē haere te aromatawai o ngā tono tahua Mā Te Reo. I nāianei, e rima kē ngā paearu (E whā he paearu kano, kotahi he paearu hāngai) ka aromatawaia i te taha o ngā tono katoa. Kitea ai te roanga o ngā kōrero mō ngā paearu i runga i tō mātou paetukutuku Mā Te Reo, i roto hoki i a mātou mōkī pārongo hōu. He kaha tonu tā mātou whakahau i a koe ki te whai whakamāramatanga ki ngā paearu i te wā e whanake ana koe i tō tono.

Ka aromatawaia tō tono i runga i te kaha whakatauki o tō tūmahi i nga paearu kano e whā me te paearu hāngai o te momo wāhanga tahua e whai ana i tō tūmahi.

Kōrero Mohoa mō Ētahi atu Rauna
Rauna 6 (2006)           e 25 ngā tūmahi e haere tonu ana
Rauna 5 (2005)           e 10 ngā tūmahi e haere tonu ana
Rauna 4 (2004)           kotahi te tūmahi e haere tonu ana
E kaha tonu ana tā mātou mahi i te taha i ngā kaiwhakarato o ēnei tūmahi kia mutu pai ai ngā mahi. Me mihi hoki ki ngā kaiwhakarato i pai te tuku mai i ngā pārongo hei whakatere i ngā mahi.

He kōrero whakamutunga nā Jasmine Cooper
I wehe atu a Jasmine i Te Taura Whiri i te Reo Māori i te rā 15 o Hui-tanguru ki te mahi i te taha o te Kāhui Mātauranga Reo Māori i te Tāhuhu o te Mātauranga. Nā runga i āna mahi i tū ai ētahi pūnaha me ētahi hātepe ruarangi mō te kāhui Mā Te Reo. Nāna i whanake tētahi pukapuka tohutohu mō ngā tikanga whakahaere me ngā kaupapahere a Mā Te Reo kua puta hei paipera mō ngā mema hōu. I pai te whakahāngai a Jasmine i ngā hātepe me tā te hapori mōhio ai he aha ngā mea pai mā rātou, me tana whakahau i te kāhui, ko te mea nui ko te ratonga pai mā te kiritaki. Mārama ana mātou, ko te wā tino pai rawa atu o te tau mōna, ko ngā wā haere ki runga i ngā haerenga aroturuki.

"Waimarie ana ahau i taku wā e mahi ana mō te kāhui Mā Te Reo i ngā tau e rima ki muri. He mea nui te mahi i te taha o ngā kaiwhakarato kakama kei roto i o rātou hapori Māori. I roto i te wā e haere ana te tahua kua kite au i ētahi kaupapa tino angitu, tino auaha hoki e puta ana huri noa i te motu, tae noa ki te mahi i te taha i ētahi tāngata kaha ki roto i ngā mahi whakaora i te reo Māori.

E tino hiahia ana ahau ki te whakamihi i a koutou mō te wā i puta mōku ki te mahi i te taha i a koutou, ahakoa taku whakahōhā i ētahi o koutou i ētahi wā".

Nā Jasmine Cooper

Te Kāhui Mā Te Reo
Clayton Reiri (Ngāti Kahungunu, Rangitāne ki Wairarapa, Ngāti Porou)
E koa ana ahau kei te haere pai ngā mahi ahakoa ngā whakarerekētanga kaimahi i roto i a Mā Te Reo. Kei te hiahia au ki te mihi ki a Jasmine me Nerissa Aramakutu mō tā rāua āwhina i a au i roto i taku tūnga me ngā kaiwhakarato mō te pai o tā rātou tirohanga me aku kaimahi hōu mō ngā pūkenga me te kakama o te wairua kua uru mai ki te kāhui.

Kei te pāhau tonu ngā mahi tuku iho a Mā Te Reo me taku harikoa ki te tuku pānui mō te taenga mai o ētahi whānau hōu ki te kāhui Mā Te Reo. I waimarie māua ko Juanita Teepa (tō mātou kaiwhakahaere tari) i te whānau maitanga o a māua pēpi. I whānau mai he pēpi tāne ki a Juanita, ko Ahuriri Te Puehu Te Tana tana ingoa. I whānau mai he kōtiro ki taku hoa a Linda, ko Rebecca Hope Aromea Lee-Reiri tana ingoa.

Ka hoki mai a Juanita i te whakamatuatanga pēpi a te rā 21 o Paenga-whāwhā ā, ka haere hoki au ki te whakamatuatanga pēpi i te mutunga o Haratua, mō te rua marama: I tēnei wā, ngā mihi nunui ki a koutou, e whai ana i tō tātou reo rangatira, he taonga tuku iho nā o tātou matua tipuna. Hei te wā!!

Hollie Smith (Te Atihaunui a Pāpārangi, Ngāti Tuwharetoa, Ngāi Tahu, Ngāti Kahungunu)
Kia Ora ! Ko Hollie Smith au, Ko au tētahi o ngā kaimahi hōu o Mā Te Reo. I whānau mai au i Otaihape, a i whakatipua au ki waenganui i a Otaihape me Pōneke.

Mō ngā tau e ono ki mua i haere au ā, i mahi hoki au ki Te Whare Wānanga o te Upoko o te Ika ki Pōneke. I tipu ake taku hiahia mō te reo Māori, te mahi whakaora me te pupuri i te reo, me aku mahi rangahau, i reira. Kua 3 marama au i nāianei e mahi ana hei Kaitohutohu Tūmahi i roto i te kāhui Mā Te Reo. I roto i te wā poto, mīharo ana au i te maha o ngā kaupapa rerekē kua pūmau te mahi a ngā whānau, hapū, iwi me ngā hapori. He mea akiaki, he mea whakaongaonga ki te kite i ngā huarahi pai mō te reo i ngā rā kei mua. Ko te tūmanako ka kōrero au ki ētahi o koutou i ngā rā e tū mai, e pā ana ki tō tūmahi me tō whai i te reo Māori. Kia kaha, kia māia, kia manawanui tātou i roto i ō tātou mahi whakaora reo.

Allie Hemara-Wahanui (Ngāruahine, Ngāti Maniapoto)
Kia ora! I tukuna mai au e Te Puni Kōkiri i te marama o Hui-tanguru ki te mahi i konei tae noa ki te marama o Piripi. Tino hari koa ana au ki te mahi i te taha i a Clayton rāua ko Hollie i ngā wiki kua pahure atu nei. Ko taku tūnga, he āwhina i te kāhui me ōku pūkenga, me te āwhina i a koutou ki te whakatinana i ngā kaupapa reo Māori i roto i tō hapori.
Nō reira kei te mihi ki a koutou me nga mahi nui whakaharahara e pikaungia e koutou.

Kaua e whakamā ki te waea mai, ka āwhina tētahi o te kāhui i a koe ki te whakautu i ō pātai e pā ana ki te tahua i tēnei rauna.

Pito Mata - He kohinga pūrākau mō te kōhungahunga

Tangohia ai ngā kupu ‘Pito Mata’ mai i tētahi whakatauki “Iti noa ana, ki pito mata” arā, “ahakoa iti, ko tōna mana, arā kē atu”. E kōrero ana tēnei whakatauki mō te wāhanga o te kūmara kāore anō i maoa, ka whakatōhia anō, ka tupu mai anō he whānau kūmara. Whakamahia ai a ‘Pito Mata’ hei kōrero mō te pūmanawa kaha kei roto i ia tamaiti me te wāhi nui o te whāngai i a rātou ki ngā karere whakahiki i te aroha.

Hei kipakipa i ngā whānau me ngā tamariki a Pito Mata ki te waiata, te pānui, te whakarongo, te whakangā, te kanikani me te moemoeā i roto i te reo Māori. Hei whakaniko i te āheitanga o ngā tamariki nohinohi me ngā whānau e ako ana i te reo Māori ki te pānui, te take i whakaurua he waiata DVD me ngā kupu o te waiata e hurihuri ana ki raro o te mata. I runga i ngā āwhina o Mā Te Reo, kua waihangatia e Takatū he rauemi ātaahua hei kawe i ngā karere huapai me ngā tauira pai o te reo Māori ki roto i ngā kāinga.

Kua hanumi he pūngao me te hawahawa tane, wahine hoki ki roto i ngā waiata nā te reo o Pānia Papa, o Awhimai Huka me Puka Moeau, ko ngā kaiwhakatangitangi taonga pūoro ko Rangiiria Hedley me ngā kaiwhakatangi taonga pūoro o nāianei ko Jamie Ferguson, ko Noel Reid, ko Vernon Matchitt me Grant Mikaere.

E kī ana a Pānia Papa "I puta katoa ngā waiata me tēnei tūmahi nā runga i te hiringa o aku irāmutu ātaahua. Ko rātou te reanga kei te mōhio ki ngā rangi o tō rātou ake nei ao – kei te ora rawa atu te reo me ngā tikanga i roto i a rātou. He huarahi tēnei tūmahi ki te kimi huarahi auaha ki te whakarato karere e pā ana ki te pai o te manaaki i a Papatūānuku, te hoatu aroha, te whakamaioha i te rerehua me te whakatipu i te pūmanawa nohopuku ki tēnei whakatipuranga hōu me ō rātou whānau."

Me whai wheako ki ngā rangi maene, ngā tauira neneke, ngā ngohe auaha me ngā korero ātaahua hoki o  
Pito Mata te whakaaro ka pēhea tō akiaki i te pūmanawa nohopuku o ngā tamariki i roto i tō ao. Me tono i tō kape i te rā nei mai i a www.takatu.co.nz mā te ī-mēra rānei i a admin@takatu.co.nz .   Mauri ora!

Te Whakamātautau Whakamahi Pukapuka Māherehere Reo Māori
E rua ngā pukapuka aratohu kua waihangatia e Te Taura Whiri i te Reo Māori mō te Māherehere reo Māori: Planning for Māori Language Regeneration' me 'Te Reo Māori i tō Hapori: Community Māori Language Profiles Guidelines'.

E karanga ana mātou ki te hunga e ngākaunui ana ki te mahi māherehere reo kia torotoro ki ngā putanga pukapuka me te whakaoti rangahau e pā ana ki ngā putanga pukapuka. Mā tēnei e āhei ai mātou ki te kohikohi pārongo e pā ana ki te whakapai ake i ngā pukapuka hei āwhina i ngā hātepe me te whakatau he aha ngā rauemi pai e hiahiatia ana e te hapori Māori ki te tautoko i ō rātou kaupapa kōkiri. Ki te hiahia koe ki te whakauru ki tēnei rangahau whakamātautau i te whakamahi o ngā pukapuka nei, me whakauru atu:
http://www.tetaurawhiri.govt.nz/english/services_e/community_support.shtml

Kua tukuna ēnei pukapuka me te rangahau reorua ki ngā kaiwhakarato Rauna Whitu i whiwhi tahua i raro i te wāhanga tahua Māherehere Reo. Tēnā koe e whakapau wā nei ki te whakaoti i te rangahau.

Ngā Arotake Whakatutukinga
Kua kōwhiria a AATEA Solutions Ltd ki te whakahaere Arotake Whakatutukinga Mā Te Reo. Ko ngā tāngata o te kāhui o AATEA ko Kiwa Hammond, ko Timoti Brown, ko Chelsea Grootveld me Ria Tomoana. Ka whakapā atu au ki etahi kōwhiringa kaiwhakarato (o muri, o mua) ki te whakauru ki roto i tēnei arotakenga. E whakahauhau ana mātou i a koe ki te whakaaro ki te whakauru ki tēnei rangahau.